Nazión
De Biquipedia
Nazión ye un termín més que més politico -per un regular ambiguo, impreziso u suchetibo- que designa un colectibo de ser umans con una zereña identidat compartita, a cuala gosa á manifestar-se en a Istoria per meyo d'elementos antropolochicos comuns, sopre tot sozioculturals (como pueden estar a luenga, as creyenzias relichiosas u ideolochicas, diferents manifestazions culturals tradizionals, etz.), que per contraposizión definen dito colectibo cara t'altros colectibos, e en a mayoría d'os casos con una boluntat de continuidat per meyo d'una definizión politica en o contesto mundial. A nazión cuenta cuasi siempre con un territorio más u menos determinato per as suyas zircunstanzias istoricas, considerato territorio nazional u patria. Os elementos comuns tienen en bels casos tamién una aszendencia u orichen comuns.
En muitas soziedaz, á nibel personal u en bels contestos politico-istoricos, o conzeuto de nazión puet estar parello á u intercambiable con es de país, Estato independient, patria u etnia. Á ormino, a definizión d'un colectibo como nazión u a combibenzia d'os feitos diferenzials de nazions diferents preboca tensions á dintro d'un mesmo territorio politico.
Encara que diacronicament as nazions han esistito dende as primeras zebilizazions, se considera que a nazión como termín politico, debez que os conzeutos deribatos de nazionalidat e nazionalismo, rancan d'as zaguerías d'o sieglo XVIII, més que més en o contesto europeu.
En o Estato español, o termín nazionalidat que reculle a Constituzión de 1978 ye d'ordinario entrepretato como un sinonimo de nazión que estió eslechito en o Congreso d'os Deputatos per razons churidicas, dato que España ye constituzionalment definita como nazión.
En l'antiga Unión Sobietica s'esferenziaba lo conzeto de nazionalidat zebil,(a republica on uno bibiba), y a nazionalidat etnica (o grupo etnico on yera a presona). Por exemplo un ruso d'Ucraina yera considerato de nazionalidat zebil ucrainiano y de nazionalidat etnica ruso.
